粤語 - 廣東話

 解釋：比喻感情破裂，公開爭詏嘅意思。 例句：個男仔搲爛塊面要同個港女分手。 字源資料［參考］ 。［搲］字係用手捉物或手爬物嘅意思。 　《集韻》：上聲 ‧ 馬韻 ‧ 烏瓦切。「吳語」俗謂手爬曰［搲］。 。［𢱑］音 waa2，意思不詳。（有推斷：抓、搔） 其他辭彙［參考］ 。搲爛：waa2 laan6 。搲損：waa2 syun2 。搲銀：waa2 ngan2 同［搲］ 字意思類似嘅寫法重有（摳、撓、𢲷、𢯎、抓 ）等.......

 讕㔹 laan2 lek1 解釋：形容人自高自大，自以為有料（能力）。 例句：你咪喺度讕㔹，等你做到先講啦。 字源資料［參考］ 。［讕］字係指抵賴、唔承認；誣陷。 　《說文》：讕，怟讕也。從言闌聲。譋，讕或從閒。 　《玉篇》：讕，誣言相加被也。 。［㔹］字係形容才華或者技術高過其他人。 　《說文》：㔹，材十人也。從十力聲。 　　段玉裁註：十倍於人也。十人為㔹，千人為俊。 　《廣韻》：㔹，功大。 。［叻］粵語用字，意思指能幹。（未知來源） 　　石叻，係馬來語［新加坡］嘅講法，又叫［叻埠］。 其他辭彙［參考］ 。讕叻：《現代標準漢語與粵語對照資料庫》 。讕嚦：《維基辭典》 。懶叻： 。爛叻： 如果真係咁㔹，噉用腳食麪喇，笨！

 罨耷 ap1 dap1 / ngap1 dap1 解釋：形容地方簡陋、污糟邋遢、霉霉哋嘅意思。 例句：嗰間餐廳好罨耷，我唔敢入去食飯，驚食咗肚痛。 。［罨］字嘅本義係捕魚或捕鳥用嘅網； 　　　　引申為覆蓋、敷﹐例如罨芽菜。 　　　　中醫亦有所謂熱罨法同冷罨法。 　《廣韻》：罨，於檢切，音奄，鳥網。 　《說文》：罨，罕也。《玉篇》：罨，以罔魚也。 　《左思．蜀都賦》：罨翡翠，釣鰋鮋。 　《徐霞客遊記．滇遊日記八》：峽中西望，重峰罨映。 其他辭彙［參考］ 。罨耷 。罨汁 。罨庢 形容地方簡陋叫［罨耷］！

蛋饊 daan6 saan2  解釋：用麪粉雞蛋同豬油整成嘅油炸食品。 例句：食蛇羹一定要落蛋饊先正㗎！ 。［饊］ 　《廣韻》饊，蘇旱切，飯也。 　《集韻》饊，顙旱切，從音散。 　《說文》饊，熬稻粻䊗也。 。［散］ 　《廣韻》：散，散誕。 　《說文》：散，作𢽳分離也，又作𢿱雜肉也。 其他辭彙［參考］ 。蛋散：形容冇用嘅人，唔係主角，係二打六嘅角色。 。彈散： 唔該整兩件［蛋饊］嚟呀！

 食𩜠𩜠 sik6 mam1 mam1 解釋：指畀嬰幼兒食嘅糊狀或流質食物。通常疊用成［𩜠𩜠］。 字源資料［參考］ 。［𩜠］係指軟而爛嘅幼兒飯。同［𩛎］。 　《廣韻》：謨敢切，音㛧。 　《篇海》：俗呼哺兒曰𩛎。 辭源資料［參考］ 。［食𩜠𩜠］：軟而爛幼兒飯。《廣州話方言詞典》 小寶寶，食蛋糕，飯仔𩜠𩜠，叔叔喂到。 食過長大，大個無壞，寶寶三歲就戒奶。

 奀咕咕 an1 gu4 gu4 / ang1 gu4 gu4 解釋：初生啤啤幾個月大，未識講嘢嘅時候，會因為口腔活動而自然發出［奀咕咕］咁嘅聲音。而好多大人就會當係［啤啤話］，會用返呢種聲音去同個啤啤仔互動、啗啤啤。 初生ＢＢ同你講［奀咕咕］！

 哱哱㲳 but3 but3 zit1 / bu4 bu4 dzit1 解釋：用手指㲳落啤啤仔面上或胳肋底或腰肢時講嘅說話，然後彼此失笑。 字源資料［參考］ 。［哱］用口吹氣同發出聲。 　《廣韻》：哱，吹氣聲。 　《集韻》：哱，薄沒切，音孛。聲也。 。［㲳］用手輕掃或輕觸。 　《說文》：㲳，觸也。從氐失聲。 辭源資料［參考］ 。哱哱㲳：清朝．詹憲慈《廣州語本字》香港中文大學出版 ＢＢ同你玩［哱哱㲳］！

 扯颬 ce2 haa1 扯晒颬 ce2 saai3 haa1 解釋：形容呼吸困難或哮喘時，發出嘅喘氣聲。 例句：佢行咗十幾級樓梯就扯晒颬。 字源資料［參考］ 。［颬］字係指開口吐氣貌。 　《廣韻》：颬，許加切，音煆，吐氣又風皃。 。［晒］與（曬）同，異體字。 　《韻會》：晒，所寄切，音躧。 　《說文》：晒，暴也。 。［曬］《玉篇》：暴乾物也。亦作䵘。 。［䵘］《字彙》：所嫁切，沙去聲。與曬同。曰乾物也。 。［㬠］《正字通》：俗曬字。 其他辭彙［參考］ 。扯蝦：［ce2 haa1］《粵典》 。扯哮：［ce2 haau1］《粵典》 。扯呀：［ce2 haa1］《粵語古趣談正續編合訂本》 行咗十幾級樓梯就［扯晒颬］！

 倀雞 caang4 gai1 解釋：形容好惡、講嘢大聲、成日鬧人嘅女人。 例句：嗰個老闆娘好鬼倀雞㗎，日日都鬧啲伙記。 其他辭彙［參考］ 。掁雞：《粵典》 。棖雞：《廣州話詞典》、《粵典》 。殘雞：《粵典》 。鋹雞：《現代標準漢語與粵語對照資料庫》 。倀雞妹［caang4 gai1 mui2］牙尖嘴利聲大夾惡嘅女仔。 。倀雞婆［caang4 gai1 po2］霸道野蠻又唔講理嘅潑婦。 。倀鷄乸［caang4 gai1 laa2］潑辣粗野絕對唔認輸嘅女人。 阿May話：講嘢大聲唔代表我［倀雞］，阿Sir'！

 𪘲牙聳䚗 ji1 ngaa4 sung1 gong6 解釋：原意系形容人狼吞虎咽，大飲大食嘅食相。 　　　後來又引申為用來形容人諸事同誇張嘅神態。 例句：睇人捉棋有條規矩就係［旁觀者，唔准𪘲牙聳䚗］； 　　　意思即係［唔准騷擾］！ 字源資料［參考］ 。［𪘲］字本音宜，齒露貌。 　《唐韻》：楚宜切，音差。 　《廣韻》：昨何切，音醝。 　《說文》：齒參差。 。［䚗］字从角公聲，舉角也。 　《集韻》：古雙切，音江。 　《說文》：舉角也。 其他辭彙［參考］ 。𪘲牙聳䚗 。齮牙竦觥 。依牙鬆鋼［借字］ 。依牙鬆槓《粵普對照手冊》 。咿牙鬆弶［借字］ 旁觀者不得［𪘲牙聳䚗］！

 餛飩 wan4 tan1 解釋：用麪皮包住菜、豬肉、蝦等餡料嘅嘢食。 例句：有朋友嚟香港，唯一會點名要食嘅就係餛飩麫。 辭源資料［參考］ 。［餛飩］一種麪粉做成薄皮，內包肉餡之食品。 　《廣韻》：餛，戸昆切，從音魂，餛飩。 　《玉篇》：飩，餛飩也。 　《正字通》：餛飩卽餃餌別名，俗屑米麫爲末，空中裹餡。 　《南粵志》：閩人十月一日作京飩，祀祖告冬。 　《食物志》：餛飩，或作餫飩。 「餛飩」因為同音，被民間寫為「雲吞」；「雲吞」亦被視為正字，呢件事係始於廣東知名狀師［何淡如］嘅一則無情對對聯：「有酒何妨邀月飲，無錢那得食雲吞」。 其他辭彙［參考］ 。餛飩麪／雲吞麪 　用餛飩同蛋麪煮成嘅嘢食； 　通常用大地魚做湯底，加韭黄同少少醋嚟調味。　 其他資料［參考］ 。細蓉：一個一両重嘅乾麪餅，配四粒餛飩 。中蓉：一個半嘅乾麪餅，配六粒餛飩 。大蓉：兩個乾麪餅，配八粒餛飩 慢吞吞，食［餛飩］！

 㿺㿭 baau3 caak3 解釋：皮膚因爲天氣乾燥而裂開，甩皮、甚至會流血。 例句：嘩，你隻手㿺㿭得好勁，快啲搽啲膏啦。 字源資料［參考］ 。［㿺］字係指表皮凸起。 　《玉篇》：㿺，步角切，音雹。肉膭起也。 。［㿭］字係指皮膚皸裂。 　《集韻》：㿭，恥格切，音坼。皴㿭也。 其他辭彙［參考］ 。㿺㿭 。爆擦 。爆拆 。爆坼 。𦢊坼